اهلا بيكم......... " ماكنش مفروض نتعود على كده" عبارة عن مجموعه من الاراء تنتقد مسلمات اعتقد انها غريبه فى حياتنا
مثلا انا بحب صوت و اداء محمود ياسين فى الالقاء......لكن مين قال انه يبقى نجم سينما و فتى شاشة....لا هو وسيم زى حسين فهمى و لا عبقرى تمثيل زى احمد زكى و لا دمه خفيف زى عادل امام........مش عارف
الكلام عن مجمود ياسين...ينطبق برضه على عفاف شعيب...مع انها حتى معندهاش موهبة الالقاء ولا يحزنون
اكبر دليل على اننا شعب غير منظم...هى عدم مقدرتنا على فهم ابسط قواعد الهندسه و هى التوازى...احنا مبنعرفش نقف صف واحد فى الصلاة... دايما تلاقى واحد واقف غلط او معووج -ودول ينقطوا اكتر- ولما تشاور لواحد فيهم عشان يظبط نفسه..تلاقيه بيبص بمنتهى البلاهة و كانه مربوط فى الارض بحجر و استحاله يتعتع من مكانه
الاول العربيات كتيرة جدا و الناس اكتر و بعدين مفيش جراجات مريحه للاستخدام تحت العمارات (بتتعمل بس عشان الرخصه ) و بالتالى العربيات بتركن فى الشارع و كمان بتلغى مكان المخصص للاتوبيس...اللى سواقه معندوش اى استعداد ان يقف فيه...فيقف فى نص الشارع او يقرب كده - من بعيد لبعيد من المحطة- حاجه كده بالنيه يعنى...فتلاقيه قفل الشارع و عطل المرور و العربيات -اللى هيه الصلا بقت كتيره اوى -عماله تزمر جامد فتعمل ازعاج لكل اللى فى الشارع بما فيهم اصحاب العربيات اللى راكنين مكان الاتوبيس....وهمه طبعا حيتوتروا و ممكن مع الوقت يبقوا عصبيين فيجيلهم ضغط
و تفضل العربيات واقفه و يفضل الاتوبيس يقف فى نص الشارع و تفضل الكلاكسات و الناس تعيا زياده و بعدين يروحوا المستشفى فيمشوا فى المرور الزحمه فممكن مايلحقوش المستشفى فيموتوا....وتخلص كده الحكايه.....لا طبعا....حيجي غيرهم ملايين عشان يركنوا فى الحته الفاضيه
